Lees voor

Gait van de Renderklippen

22-02-2012 00:00
0 reacties

Disse keer kump ut huukien un alderkeizers ende vot: Oman nog is an toe. Daor heft ut Meneertien un wèke in un allemachtige grote zandbak meugen speulen. Ie kunt an zien bruune kop ofzien dat hee niet op dreug brood hef ezèten bie de Sultan. Nee, a'j ut mien vraog kreeg hee daor heel wat meer deur de sloeke as tuus in de Ramabuurte, mar ik mut uutkieken wat ik schrieve want veur ik ut weet heb ik ut Knuffeltien an de draod hangen en dan geet utlange niet van wat zol dat. Hee zal dur wel an mutten wennen dat zee um niet zo in de watten leg as ut pàsseneel van de sultan. Die stop oe de stoete in de mond en as ze ut konnen zollen ze ut ok nog veur oe slikken. Ut Meneertien worden eneug deur de massapanten van de Sultan umme zes dagen lank achter hàtjagers an te jagen. Heb gien meelie met um want hee hoeven gen tree te verzetten. De Arabieren daor loop oaver van gasvrieheid. Ze neug oe uut en ut is ze un ere umme oe vol te stoppen. Ut nemp niet weg dat disse mensen ok gevuulens en eur trots heb. Bie dat hàtjagen in Oman speult de Fransen de eerste viole en rèkent mar dat dur veur eur mooi wat an de striekstok blif hangen. Die luu van de Tour heb noe ene keer de adressies . Ze heb alle mach nao zich toe etrökken. Ze wollen met eur arrogansie de Arabieren ook nog is effen vertellen hoe ze dit en dat mossen anpakken. In de busse wao de mensen van de pàs mee van en nao ut parkoers worden ebracht wollen twee Fransden die ene sjaffeur de les lèzen. Hee mos niet dit en moch niet dat en ut mankeren dur nog mar an dat ze um ut stuur uut de klavieren trökken. De sjaffeur zei niks. Ok niet toen ene van die Haantjes de schoenen uut deej en de blote katjes op de op ut rooster met de frisse loch leggen. A'j un Arabier hellug wilt kriegen dan mu'j oe zo misdragen. Toet ze bie ut vertrek kwamen maken de andere Fransen um duudeluk dat hee met de busse un rechtse drééj mos maken dan stun hee nao ofloop an de goeje kante.De sjaffeur wis hoe ut nog veule makkelukker kon. Hee maken rechtsumkeert en ze heb um de hele wèke niet weer ezien. En daor stunnen die twee Fransen met de mond vol tande. Die beijen waren veur de res van de tied de koffer kwiet. Pattie zjoernalistn de komploeter en anderen allenug ut schriefblok. Ut Meneertien missen de zakdoek mar daor heb ze dur genog van en ze draag die ok nog umme de nekke. De Fransen heb de hele tied met utzelfde grei mutten lopen. Ut was net un lopende mesvaalt. Pas op de leste dag stunnen de kofferties netties naos mekare in de hal van ut hotel. Ie mutten un mense in zien weerde laoten. Wuule hoeven ok gien vief keer op un dag op de kniejen, hef ut Meneertien mien laoten weten. Troiuwens, ik den ke dat hee nao un keer of drieje van zien lang zal zien leven niet meer in de bene was eraak. Hee hef ut wieter veur de res onmundug nao de zin ehad en is ok nog bie un sultan op de thee ewes. Die hef um eneug veur de volgende Tour van Oman. Hee hef un kladde ruukspul mee ekregen waor hee dehele Ramabuurte mee kan bedwelmen. Luu, volgende keer ietsies minder veere vot. Ontvank de groetenisse van Annegien, Merie en GAIT.